Kan lai hlasakthiam mi hna lak ah a tu lio te ah cun uar taktak mi le hman taktak mi nungak Van Hlei Sung cu laimi a simi poah nih cun kan theih dih cio lai ti cu theihcia a si. Anih hi thangthar tleirawl te a si nain a hlan lio zunnhla pawl a thar in a van sa than tu a si caah mipi nih kan uar khun nak zong hi a si. Lovesong singer of the year tiang zong an kan ngah piak tu pakhat a si.
Laihla lawng siloin Mizo hla zong kan hnu thla thlanolh te ah khan pakhat a sak. Cu a sak mi cu youtube ah lyrics video sawhsawh in an upload i thlakhat chung bak ah 1million views a phan manh, a tu ah cun 1.4 millions views a phan cang. Nai te ah khan hi hla hi a video in a van siam i cu a siam mi video cu a tu lio ah hin Mizoram ah a lar bik mi hla ah ai chuah.
Mizoram chung ah hin nichiar zaanchiar bak mah le duh mi hla cio TV (Zonet channel) ah hin request tuah khawh a si. Na duh mi hla kha rak kan chuah piak uh tiah “hla hei thlan” request khawh a si. Hibantuk hla thim ah hin mipi nih thim bik mi hna lak ah top 10 thim a si tawn. Top 10 a phan cang mi hla cu a lar taktak mi le mipi nih an duh taktak mi a si tinak a si. Cu top 10 lak ah cun Van HLei Sung nih a sak mi I Tang Ka Belh Lai Khan Ka HLim Zawt Si timi hla cu ai tel ve lawng siloin number 1 ‘top one’ bak ah a um. Mipi nih an duh bik mi hla le an ngaih tam bik mi hla a si tinak a si. Phundang kan chim ah cun a tu lio ah cun Mizoram mipi nih an duh bik mi hlasatu cu Van Hlei Sung a si ti khawh khi a si. Lairam nak in Mizoram ah Van HLei Sung hi a lar deuh cang. Bawipa nih umpi peng seh.
Leave a Reply