Tulio cu SAC ralkap zong nih Technology hmang tangkai in mitleihnak tiangah an hman thiam cang i mipi caah cun thinphang ngai a si. Mi phone an check piaknak lawng hmanh si loin hmanthlak an delete ciami hmanh an chuah than khawh. Cu ruang i tleih a tuarmi zong an tam ngaingai hna.
June 14 i Sein Shwe kone sianginn kang tanah minung 40 reng lo an tleih hna i bia phunphun an hal hna i hemnak fak ngai zong an pek hna. Cu minung 40 lakah cun an chuah mi hna zong an um ko nain mi cheukhat cu an phone chung hmanthlak ruangah voihnih tleihin tleih tuarmi zong an um hna.Nau pawi liomi nu pakhat hna cu ralkap nih an vuaknak ah a nau zong ai rawk phah. Amah cu an hrem hnuah an thlah ko nain a phone chung lam zawhin ralkap uknak duh lonak an langhter lio hmanthlak an hmuh caah an tleih i an hrem mi a si.
Khuami pakhat nih cun ceet computer in a check piak i a rak delete cangmi hmanthlak pawl cu an rak chuak dih than i cu hmanthlak ah cun ralkap uknak duh loin lamzawhnak an rak ngeihnak hmanthlak pawl cu an hmuh hna i cu i ai telmi a hawi le pawl an umnak address pawl cu an hal i a chim duh lo caah fak tukin an hrem i a nau pawimi tiang ai rawk phahnak cu a si.
Cu caah cun kan phone chung i hmanthlak pawl cu zeitin dah chuahthan kho ti loin kan tuah lai tiah cun kan phone chungah hin ralkap uknak duh loin ca ti bantuk le hmanthlak ai chiah lomi hi cu kan um theng lai lo.Boruak a that lo tuk caah cu pawl hna cu kan delete dih cang ko lai nain ralkap pawl nih kan phone chung i kan delete cangmi zong an chuah than dih khawh caah zeitik caan paohah a him lomi dirhmun ah kan um kho hna.
Cu caah cun kan delete cangmi pawl chuah than khawh ti lo dingin zeitin dah kan tuah lai tiah cun a phunphun in a um nain cu lakah a awl sam bikmi pakhat cu App hman hi a si. Android App ishredder Shareddit le data Eraser cb tibantuk an hman tlangpi deuh hna i cu aap cun phone chung i an delete cangmi data umnak hmun lawng pawl cu a thianh dih lai.
A thianh dih chung cu a sau ngai lai caah na tuah hlan ah na phone 80% cu tun ta hrim hrim te. Zeitin dah data Eraser kan hman lai tiah cun na download hnuah home Screen i Freespace kha hmet law File access le contact access ”allow ” na ti hnuah internal storage kha hmeh piak ding si la. Zeitluk in dah a thianh timi cu na theih ko lai.
Continue hmet law a hril lai. Method 5 a lang lai. NATO standard a si lo le BSU Tl- 0342 timi kha hmet.A thianh ning a sang bikmi a si i rounds 7/8 bak a thianh lai caah a caan cu a sau ngai lai. Thil thumi tuahnak a si bantukin limit ngei loin tuah na duh a si ah cun phaisa pek a hau ve. Free version cun nikhat ah 100MB lawng a phiat khawh.
Leave a Reply