Social Media (Facebook ) Ah Hmanthlak Na Post Lengmang i Na Um kal nak Na Langhter Lengmang A Si ah Cun Hi Dirhmun Ah Na Dir Kho Ve

Hi ca hi a donghtiang in rak rel law misual kut in na him phah pin ah na ngeihchiah tiang zong na humhim khawhnak lam ah an hruai ve hrim hrim lai .Fimnak hi ca chung ah a um ti a si caah ca hi tampin rel kho peng usih ti zong ka van tenh ta duh fawn .”Kez” ti ah auhmi kum 21 mi Kieran Hamilton nih zaankhat cu a umnak Manchester inn i aa hngilh cuahmah lio ah thawngpang a theih duk i aa thang .

A zuatmi uico pahnih an i seh i a si lai tiah a ruah sawhsawh .Asinain a innchung ah cun namtong saupi aa kenmi misual pahnih an rak lut i na ngeihmi na phaisa le rithaisii le na nazi rak kan pe zok na duhlo ah cun kan in thah lai tiah an hro colh .Zeiti tuahawk a theilo caah a sianlo tuk bu cun a ngeihmi cu a pek dih hna .

Ahnu ah a chim than mi cu “Ka ngeihmi tete ka instgram ah ka post lengmang ruang ah misual nih an rak hmuh ve i tu bantuk in ka inn cu misual nih hrem i thahnak hmun ah ka can ter dengmang ” tiah Media sin ah a chim than .A mah hi sipuaizi a thiam ngaimi a si caah phaisa tamngai a hmu kho i motor manfak le nazi manfak le thildang tete a duhmi poah aa cawk i mirum taktak bantuk in a nung i a ngeihmi cu ainstgram ah a rak langhter lengmang caah tu bantuk thil a ton hi a si .

Culawng silo in vawleicung footballer minthang asimi John Terry zong Social Media ah a mah follower minung 3.4 million hmuh dingin a family he holiday hmang dingin hmundang ah an kalnak cu afan pawl hmuh dingin a post ruang ah misual nih cu a postmi cu an rak hmuh ve i an umlo kar ah a inn cu an rak luh hnawh i £400,000 man thil mansung an rak lak piak diam .

Culawng si rih lo vawleicung tawttawk that lei minthang Model Kim Kardashian zong 2016 kum lio ah a instgram ah a thil post mi hmangin a hnu in an zulh dawi i holiday a hman nak Paris khuachung ah chunlai bak ah palik thuam in ai thuam mi misual minung 5 bak nih an tlaih i a ngeihmi thil an chuh dih hnu ah toilet chung ah an kharkhumh ta . Cu a thilto mi ruang ah a hnu ah cun a instgram zong ah a thil post ning a thlen cang tiah theih a rak si .

Na facebook le na Instgram ah nitin na cawlcangh ning le na umkal nak vialte na langhter i na post tik ah nangmah na friend le a follow tu chung ah khan misual le mi thalo an rak um ve i na sining an theih hnu ah cun nangmah caah a him lo ngai cang i an duh tik poah ah na cung ah can tha an la kho cang ti kha thei law rak i ralring thiam ve law cuti cun na him deuh lai .

Be the first to comment

Leave a Reply

Your email address will not be published.


*