Mindat khua nu /pa palai ah hmangin SAC ralkap le CDF Mindat karlak ah ni 14 chung i kap lo dingin June 20ah remnak an rak tuah cang ko nain ralkap lei nih cun cu an biakamnak cu an let. Harsatnak phunphun tuar in ramlak ah ai dormi hna Mindat mipi cu inn ah kir than kho cang dingin remnak an rak tuahmi cu a si i June 20 in July 4 tiang i kap lo bak dingin ralkap pawl zongnih cun an lungtlin nak cu an chim ve.
Hi konglam he pehtlai in Mindat Khua nu / pa nih a chim ningah cun hi ti kan tinak ruang cu thinphannak zeihmanh um lo dingin mah inn le lo tang te i lawi le um khawhnak caah ramlak i a vakmi Mindat mipi caah si tiah a chim. Khuachung i a lutmi pawl cu ralrinnak ah tiin meithal a puak khomi pawl cu an i ken maw ken lo timi checknak zong a um lai.
SAC ralkap nih cucu an check lai nain tleihkhih nak um lo dingin bia kan chah mi cu a si. Voikhat cu rualremnak cu cu tin an tuah nain tuni June 23 ah SAC ralkap nih cun Magway lam le Mindat tlunkalnak lam ah ralkap pawl cu an duty i motor ai chawkmi paoh cu fak ngai in an check hna tiah theih a si.
Khuami pakhat nih cun Mindat CDF aiawh in khua nu /pa le SAC ralkap pawl cu i remnak an ngei ko nain khuachung i facang phurmi motor le sii ai phurmi motor pawl cu an luh ter duh hlei lo. Cun kum 50 chunglei minung cu duh tawkin khuachungah an lut chuak kho nain patungno le mino pawl luh ding cu an duh lo taktak. Khuachung i a um cia mi mino pawl zong cu an chuah ter duh ti hna lo ti si.
A sinain mi tam deuh nih cun SAC ralkap pawl cu an zumh khawh hna lo caah ramlak in a kir duh lomi cu an tam deuh thiam tiah a chim. SAC ralkap pawl hi Mindat CDF zongnih zakhat ah zakhat cu an zum kho bak lo nain ruahsur lak ah harnak phunphun lak i a um mi Mindat mipi hna ruatin mitchit kamseh in SAC ralkap hi an dawrmi hna a si. June 23 zongah SAC ralkap pawl le Mindat CDF pawl cu remnak phun 5 zong an ngeichap tiah theih a si.
Leave a Reply