Rel Cio Uh : Barborhsung Kong Buainak Cu ‘Hi Cabia’ nih Hin A Phih Bak cang Hih , Cipkhap rak Ti Ngam Ding Pei A Rak Si Lo Hi

Parborhsung thawng in Plagiarism le Intellectual property right (IPR) tepawl kong theihtlei kan van ichap ngai hna. Lainu nan men lo.Phung le phai he ai pehtlaimi ah cun a cungpalang hngalhnak sawh in mi iden hi ralrin ngai a rak hau ve. Zatlang phung (ethics) in iden le cozah phung (law) in iden ti in ṭhen khawh asi hnga.Thilfir kan puh hna cun cu thil cu kanmah ta asi ko timi tehte a hau. Phung a lutmi thil (patent rights) ah ser a hau hnga.

Phung a lut lomi asi cun cozah phung ning in iden a har lai.Kan Laithil hi pumpak le company nih patent rights tuah a ngah hnga dek maw. Fashion copyright (US) ning in thilthar bak asimi le thil dang he ai lo lomi lawng an pek ti si. Rong (color) nawnnokmi copyright an pe lo ti asi fawn. Fashion copyright hi kum 15 chung a nguh ti si.Ram kip nih Traditional Knowledge and Intellectual Property vennek phung an ngei hna. Miphun hla, tuanphung, zung thiamnak, siiai, thuamthil, thlaici tepawl tampi ai tel.

Defensive protection timi in an miphun ta asimi kha pumpak le company nih nawnnok i miakmal hmuhnak ding in an kham. Fashion company tazacuai ai huahmi an um len.Positive protection tu cu miphun thil a thancho i miphun nih hlawknak ding caah phung serpiak kha asi ve. Mipi caah amiak hmuh ve ding, a neitu miphun sinak cawisan ding tbk in company he hnatlaknak tuah te hna khi asi.PBS buainak hi Copyright Act, Trademarks Act, Design Act tiang a phan lo, plagiarism lawng asi.

Plagiarism cu cozah phung (law) nakin zatlang phung (ethics) he ai pehtlai deuhmi asi.Atu bantuk in FB ah inawr kha a dik cem ko.Laimi cu mipi le pawngkam mithmai a zohmi kan si caah thil ṭha tampi a chuak kho ko.Sipuazi a tawngcianmi nih zeirel lo khawh asi ṭhiam.Kan thil kha phung lut ah kan ser khawh lo i phung ning in nawr awk a ṭha lomi asi cun market ah izuamcawh ve ding kha iruah cia ve hau ko.

Kan laithil hi patent right pek ding hei si seh law thil ti kho nih computer in ol tein thawi an nawnnok hnga le thil phun a thong in anmah ta asi kho. Flagship caah thil phunkhat te tu kha hamter an hau hnga.Chim duhmi cu mifim, thilthei, thilthiam, thil ti kho nih miphun an kan cawisan rualrual in miphun an kan tlaihhrem khawh ve timi hi ralrin a rak herh tuk ve.

Be the first to comment

Leave a Reply

Your email address will not be published.


*