Ram Leng Chin Miphun caah ral thar!
>>>>>>>>>>>>>>>>>
Kan theih bantuk in, US ah a ummi kan Laimi cheu khat cu nai cikua ah, Asian an si ruang bak ah, nam sawh le meithal kah tiang an tong cang. Mirang ram cheukhat ah, Asian lei minung tampi zong tuk le velh an tong ve cang. India ram tiang ah, Hotel riantuanmi kan unau cheukhat cu biafak le biachiahru in “zawtnak chuahpitu miphun nan si” tiah sik le hro a tongmi an um cang!
Hi bantuk Asian huatnak hi a karh lai; cucu Ram leng um Chin miphun dihlak kan caah ral thar a si!
A ruang?
Hi zawtnak a rak chuah kaa te ah khan, social media tampi nihcun “Wuhan Virus” tiah an rak auh. Sihmanhsehlaw World Health Organization nih zawtnak virus pakhat kha miphun pakhat le ram pakhat min cherhchan in auh ahcun, vawleipi ah cu miphun le ram huatnak le ralnak a chuahpi lai, timi a hmuh caah a rannak in, cu zawtnak cu COVID-19 (Coronavirus) tiah min a pek colh.
Cu ti cun, COVID-19 cu vawleipi nih hun hman cio a si ko. Sihmanhsehlaw China nih hi zawtnak virus ruangah vawleipi mi mawh an phorhmi le an ttihnak le hrialnak vilate hi midang liang cungah khinh chin a duh ve caah, kan hnu ah khan Chinese Foreign Ministry officer pakhat nih “Coronavirus hi US ralkap nih Wuhan ah an luhpimi a si” tiah a ti si..
Cu hnu ahcun, US cu duhthimnak dang a ngeih ti lo caah secrectary of state nih coronavirus cu “wuhan virus” tiah a auh colh ve. Atu ah, President Trump nih “Chinese Virus” tiah a hun auh ve cang.
Cu tin an auh cu, hi virus kongah US rampi nih vawleipi hmai ah minchiatnak le mawhphorhnak a co ve sual nakhnga lo, an vennak a si!
Sihmanhsehlaw hi thil vialte nihhin, aa tinhmi lo theipar a tlai te lai. Nitlaklei ram minung hna lak i extreme (karhlei kam pawl) nih hihi hriamnam ah an hman lai i Asian minung pawl remlonak, le ralnak an karhter lai.
Cucaah ram lengah a ummi Chinese muikeng Asian miphun vialte, a hleice in, kan mah Chin miphun zong kan i ralrin ngaingai a herh lio caan te a si.
Hi tiang lawng hi ka langhter rih lai. A herh ahcun ka peh tthan te lai.
Credit : Pastor Hram Bik Lian
Leave a Reply