Kaya ramkulh Pruso myone Mosoe khua pawng ah ralhrang pawl nih khuami ral tih ah a zaam mi hna minung 35 cu lampi ah an rak tlaih hna i nu le hngakchia tel in an zate in an i citmi motor chung ah an nun bu in an khangh dih hna tiah Karen mipi humhimtu KNDF nih thawngthanhnak an tuah.
KNDF nih cun “December 24,zanlei ah Pruso myone Mosoe khua pawngte ah ralhrang ralkap hna nih ramzam mipi hngakchia le nunau tel in minung 35 cu an nunbu in mei in an khangh hna i an ruh lawng a tan cang caah a ho an si hmanh theihkhawh an si tilo.Hi ralzam hna hi raltih in a zaam mi an si i tubantuk in sualnak ngeilo mipi nunnak zeihmanh rello in alatu ralhrang pawl cawlcanghning hi vawleicung phunglam he aa kalh bak mi asi”tiah ca an chuah.
KNDF nih ca an chuah pin ah KNDF aiawh in thawngthanhtu zong nih cun “Ralhrang pawl nih an nunbu in an khanghmi hna hi Pruso myone chung an si ti cu theih an si cang ko nain an khua tu cu fiangte in theih a si rih lo.raldohnak hmun a si tik ah khua ah an um ngam tilo i a zaam mi an si hna. An zaam nak lampi ah ralhrang nih an rak tlaih hna i an i citmi motor chung te ah an nunbu in an khangh dih hna.
Atutiang an sining kan hlathlai cuahmah hna i,mithi an tamtuk tik ah fiangfai tein kan thei kho thlu rih hna lo.Ralhrang pawl an cawlcangh ning cu a mak tuk lawmmam i minung lungthin zong an pu kho ti lo,sahrang thinlung an pu cang i a hruh bak in an hrut taktak cang” tiah an chim ve.Prusoe myone chung i aum mi mipi hna minung 80 zong tuandeuh ah ralhrang nih an rak thah cang fawn hna.
Cu an thahmi hna pawl cu khatlei le khatlei i kaplo dingin remnak an tuah hnu ah khuami khua a va hlam thanmi pawl nih an ruak an va hmuh than mi hna an si.Cuhnu ah ikahdohnak a chuak tuk than i ralhrang lei zong mi tamtuk an thi ve nain mipi lei nih faktuk in an tuar ve. Kaya ramkulh chung ah cun Kareni army KA,Kareni miphun humhimtu KNDF le PDF pawl cu mipi humhimtu an si i ralhrang a dotu an si.Kaya ti aiah anmah nih cun Kareni timi min hman an uar deuh.
Leave a Reply