Kawlram ah Chungkhar Pakhat Hna Cu Lampi ah Misual Phu nih Chunlai ah Thingtan in An Thuat Hna , An Fanu nih Democracy Ram A Si ah Cun diknak in Bia Kan Ceih u Tiah A Aupi Ve ( VIDEO)

Kawlram Mungzua khuapi ah khua a sami chungkhar pakhat hna cu an chungkhar in lampi ah misual nih thingfung hmangin fak ngai in kut an thlak hna caah an pa bik cu sizung a phan i mungzua sizung ah thlopbul cuahmah lio a si . hi kong he pehtlai in an fanu nih video langhter chih in hi ti hin mipi theih ah ca a tial .

“Ka pa hi dik lo tak in mi kut a ton caah dik tein biaceih piak nak a hmuh khawh nak hnga hi video te hi zangfah nak tein rak ka share piak cio hram u tiah kan nawl hna . Hni (Lung gyi) a hring mi ai hruk mi khi ka pa a si i , a video hi zahceu lawng ka lak manh caah zeitluk in dah mitha lo pawl kut hi ka pa nih a tuar timi a tling dih lai lo .

Ka nule pa le ka naupa an pathum tein lampi ah thil va cawk dingin an chuak i , cu ah cun a hlan i ka pa a rak remlo tu le a rak hua tu mi thalo pawl nih lampi in an rak bawh hna i fak taktak in an rak velh hna .Ka nu le ka naupa cu mah tluk in an tuar tuk lem lo nain ka pa tu cu mitha lo pawl minung pathum nih a mah lawng cu thingfung he an thuat caah a fak tuk i a tu hi Mungzua sizung ah an thlop cuahmah lio a si .

Kan sifah le santlaih lo hi a kan nihsawh ruang ah a si ko , ram pakhat a si ve mi nih cun phunglam zong an ngeih dih ve i tu bantuk in chun lai bak ah mipi lak ah ka pa kut a thlak tu le fak tuk hliam a tuarter tu misual pawl hi cozah nih fak pi in hremnak an pek awk hrim hrim a si .Cunglei cozah nih hremnak an pek khawh hna nak hnga rak kan tanpi ve u law hi video zong hi rak kan share piak ve hram u .

Kan nih hi safak santlai lo te kan si tik ah mikut tuar ruang ah phaisa tampi dihin sizung i kan i thlop mi zong hi kan caah cun a fak tuk hringhran .Santlai lo sihmanh u sih law hi bantuk dik lo tuk in fahnak a kan pe tu misual pawl hi cu ngeihthiam hrim kan tim ve hna lo . Cunglei nih hremnak an pek hna lo ah cun a herh ning poah in kan cawlcang ve lai i hi khuapi chung i tuanvo ngeitu cozah lei nawlngeihnak a ngeitu zong a herh ning in cunglei ah report nak tuah kan ngamh , kan duh bik mi cu a hodah a palh i a hodah a hman timi biaceih nak hi a si ko .

Ka pa nih hin a lakka in misual kut hi tuar hrim hrim hlah seh law rorel nak dik le biaceihnak hman cu hmu hrimhrim seh ti kan duh caah diknak a tanh mi poah nih rak kan tanpi hram u ” tiah kawlnu a pa misual kut a tuarmi nu pakhat nih Social Media ah video a post i ca a tial chih .

Source   :  Shwethoon8