Kan Hawinu “SuiSui” te Inn A hrang an ti Caah Kan Hawikom (4) nih theih duh ah Kan va Riak i Kan Thilton mi hi rak rel ve Na Ruahnak Lengpi a Si Lai

Kanmah hawikom lak ah hin nungak pakhat a um ve i “Suisui” a si i a nih hi kan sin ah hin tlangval bantuk bak in ai kom ve mi a si i kanmah zong nih nungak bantuk hmanh ah kan ruat ti lo i pa bantuk in kan zoh deuh vemi a si cang . Sui Sui te inn hi kan khua ah cun inn hriangkawng bik ah a um mi a si i anmah he ai neih bikmi inn hmanh hi ke in minutes 10 hrawng kal a hau .

Sui sui te inn pawng ah hin thingkung lian pipi an um hna i an inn hi thawngpang a dai i um a nuam kan ti caah kan hawikom rual hin sunday pumh dih poah ah cun kan i tong tawn hna i nuam ngai in can kan hmang tawn hna . Zingkhat cu ka thawh hlan zing sml 6:30am hrawng ah cun ka hawipa “Kawi Thawng” nih cun ka it nak hram ah cun ‘tho zawk’ tho zwk ti in a van ka thangh i “zeihme mi thawh hlan hlan ah cun ” ka van ti cun Sui Sui te innpawng ah ai awk mi an um a ti i chimh nolh ka hau ti lo a ran nak cun ka itnak cun ka tho i ka hawipa mithmai ka zoh cun a ka hlen lo ti cu fiang tein kam hmuh khawh .

A rannak cun hmaizong phiah lo in ka cycle tawh cu ka lak i ka zul ka ti i leng ah cun kan kuat i kan innhmai ah cun kan hawile pa zong an rak um diam cang i kan pa 4 cun Sui sui te inn lei ah cun a ran nak in kan tli colh ve . Sui sui te inn kan va phak cun kan ruahnak in minung an rak tam rih lo i , khuabawi tlang le mithi chungkhar an rak hngak hna i a hohmanh nih a ruak cu an rak tong ngam rih lo . Tlawmpal a rauh ah mithi chungkhar le khuabawi tlang pawl cun an rak phan ve i a ruak cu an lak i an kalpi .

Mipi zong cu an lawi dih cang hna nain kan nih hawikomm rual cu kan hawinu Sui sui cu kan van thutpi rih ta i kan thiam tawk cun kan hnemh . Sui Sui a mithmai zoh tik ah a thir in a thir i a tih timi cu chim haulo in a muisam nih a langhter. Sui Sui pa cu innchung ah cun a rak lut i “Kawi Cung” ai awh nak hri hi na duh maw ” a ka ti i ka bialeh hmanh hngak lo cun an inncung lei ah hri cu a hei hlonh diam .

Sui sui nih cun tuzan cu nan zaten rak kan leng hrimhrim u mu a kan ti ta i kan lawi ve . Azan cu a hohmanh Suisui zong cu a rak lengmi kan um hlei lo . A thaizing cu sunday a si i voidang tawn bantuk cun Suisui te inn ah cun kan hawikom rual cu kan i tong than hna i Suisui cu nizan i kan va len lo mi ruang ah si lai , a hohmanh mithmai tha zong a rak kan pe duh lo . “zan ah rak leng u ti ko mi , hohmanh nan ra lo nan sual tuk zan ah le ai awh nak hram ah khin thawngpang a um peng fawn ” a ti i a kan zai hnawh chih .Ahohmanh nih a bia cu kan zumh piak duhlo i lih ah kan ruah i a mah tu cu  attang tuk ve i a tah lo lawng hi a si ,  Wai wai kan i ken mi cu a kan chumh piak i kan hawikom rual cu kan ei hna .

Wai wai kan ei khawh cun Suisui a nulepa cu pumhnak in an rak lawi ve i , “Aw nan hawikom rual nan rak tling manh ti nan um cu a tha tuk na pa te nih hin khika nizan ai awh nak thing kha a theuh kho lo i amah lawng cun , nan mah tu nih nan um lio ah nan hei theuh piak lawlaw a hau ko ” a kan ti i kan 4 cun nizan i pa pakhat ai awh nak thingkung cu kan va hau i kan va theuh piak dih . Cuhnu tlawmpal ah cun kan hawirual cu kan innlei cio ah kan lawi ve colh hna . A thaizing cu ka riantuan lawipah ah Suisui te innlei ah cun ka rak pial pah than i an inn cu tawh lianpi in a rak i hrenh dih i ka lau ngai , Suisui cu ka hei phone i ka pi le inn ah kan um tiah a van ka chimh .

Nizan kha suisui le a nu cu aiawk mi pa kha fiang tuk in an hmuh caah an tih tuk i a pi le innlei tu ah an rak riak i a pa lawng an inn ah a rak riah kha a rak si . Zanriah eikhim cun Suisui a pi le inn ah cun kan hawikom rual cu kan va kal ve i kan va leng ve hna . Suisui nulepa zong cu an um ve i “Ka pa ziah inn lei ah na riak ti la lo maw ” tiah suisui pa cu ka hal i suisui nih cun ” mah kong cu hme kan chimh duh hna cu a ti i kan zate cun kan i zoh i kan lau ngai .”Ziah nan inn cu a hrang manh colh le maw ” tiah kan hawipa Van van nih cun a van ti hna .

Suisui pa nih cun lakphak a din pah cun hi ti hin an inn a mah lawng a riah zan i a thilton mi cu a kan chimh . “Nizan ah khan nan hawinu suisui le na nu hi an ningti deuh caah a pi le inn ah hin an rak riak i kei tu cu milai patling pi innchuah tak i mi inn va riah ve cu tiah thlachiat ka ruat i keimah lawng inn ah cun ka riak. Hika hin zanriahb kan ei hna i zanlei sml6 hrawng ah kan inn ah cun va riak dingin kai thawh . Kan inn ka phak lai te ah cun kan innchung ah cun buhbel tlak thawng ka theih i zei pipa ah ka ruat lemlo kan chizawh a rawltam i buhbel a tlak i a si lai tiah ka hei ruah men ko .

Inn chung ka va luh cun tuanglai ah buhbel a rak tlak len lai cu ka ruat nain kutka ka van hun cu zei buhbel hmanh a rak tla lo i kan buhbel cu kan chiah ning tein a rak um dih ko i amak ka ti ngai ningtih nak cang zong ka thei rih lemlo . Voksa ka cawkmi cu ih hlan chung van i car ta ning ka ti i ka voksa cu ka can i meipung ah ka car pah . Ka duhtawk ka car hnu cun ka mitku it ning ka ti i ka ih nak lei ah cun ka kal i itkhun ah keimah lawng cu ka it . Ka it pah cun kan mithi kong cu ka ruat i , ka ruahnak he kan i komh cuhamah lio ah cun kan inn kutka cu a van kingh thluahmah i ziahhme zantlai hnu ah ka chung le maw an rak kir than hnga tiah ka tho i kutka cu ka va on .

Kutka ka on cun a hohmanh an rak um lo i a mak ka ti ngai i ka khuaruah a har pah ve cang . it than ko ne ning ka ti i ka itnak lei ah cun ka va kal than i ka itkhun cung ah cun ka it than . Ka van i hngilh pah ka ti ah cun ka it nak cunglei i canpheou lamh thawng nih cun a van ka thangh than i nazi ka zoh cu 12:30am bak a rak si manh cang .Zeithawng hme si ka ti i ka lu ka van tun deuh cun , canpheuo cung cun minung a tli mi bantuk khin a lamh thawng cu a rang thluahmah i kan inn cunglei ah hin bawlung chuih hna sehlaw cuko cu a lo cang a rang deudeuh .

Kai tuar ve ti lo i pasal ka si lo maw ka ti i ka datmei cu kai lak i leng ah ka chuak i kan inn cu ka hel kual i cuti kan inn ka hel kual lio ah cun ka hnulei cun a ka zul ve mi pakhat a um ti ka theih . Ka hnulei ah kai her i hohmanh ka hmu hna lo , a can ah ka hnakhaw hram ah thawchuah thawng bantuk ka theih i ka chunglei khuasik a chuak i tihnak in ka khat . leng ah cun sauzong um duh ti lo cun inn chung lei ah ka lut than i ka itnak ah cun ka tli colh . Ka it ka ti i tlawmpal kai hngilh la ka van ti ah cun kan coka lei cun thilkang rim a hung nam thluahmah i a ran nak in ka tho i coka lei ah cun ka tli .

Khuaruah har a si mi cu ka itlai ah tha tein ka voksa car mi ka fim ta ko mi meipung chung ah cun a rak i peih dih i a rak kaang thluahmah . Meipung hi ka it lai ah ti in tha tein ka hmih ta mi a si fawn , voksa cu cunglei in tla seh law a fathul he tla ding a si fawn a fathul cu tha tein ai bat fawn ko a voksa lawng mei i ai peih cu a mak ka ti i tihnak in ka khat ve cang . ka voksa cu a ran nak in coka bizu chung ah ka fim ta i ka itnak khaan lei ah ka tli colh i ka Bible kai lak i ka keu i ka hmuhnak zawn poah ka rel i cuticun thlacampah in ka taang ah bible beh pah cun ka um .

cupin cu thawngpang ka thei tilo nain zankhuadei i hngilh tilo cun ka tleivar lawlaw . Zinglei sml 6 hrawng cun khua a ceu i a ran nak in hika na pi le inn ah hin ka rak ra colh ve ” tiah a kan chimh cun kan hawikom rual nih cun biatak tein achim mi cu kan rak ngai . Suisui pa a biachim dih bak cun kan hawilak i pakhat a si mi “Pa Ceu” nih cun tuzan ah kan pa 4 in kan va riak ve tuah lai cu a ti i , a hau lo cuh ka ti colh . Asinain kan hawile pahnih nih cun aw va riak ve rengreng hna u sih an ti chih ve caah , keizong nih kan hawile lak ah ralchia cem ti cu ka duh ve lo caah riah nan ti peng a si le riah hna ding a sin ko ka ti ve hna .

Tlawmpal kan thu i zan nazi 10 a tlin cun kan riahnak ding Suisui te innlei ah cun kan hawikom 4 ning cun kan in thawh hna . Umhar phen ah kan ti i ‘Phe'(Playing card) kan i ken pah i Suisui te inn tuanglai bak ah cun itnak kan tuah i itnak cung ah cun phe cu kan i kah pah hna . Kan duhtawk kan i kah khawh hnu ah cun i hngilh hna u sih kan ti i mei kan hmih i i hngilh cu kan i tim . Minutes 25 hrawng kan van it i hngilh kan i timh bak ah cun kan hawipa Pa Ceu nih cun Kawi cung tho zawk hih “Kawi siang” a um ning hman lo hi a ti i ka van zoh cu a mah tein a kut pahnih in a hrom ai rek chih i a thaw a chuah kho lo ti cu a fiang .

Kan pathum cun kan hawipa Kawi siang kut cu kan tlaih i kan samh chih kan thlan zong chuak dih in kan tlaih hnu ah a kut cu kan samh khawh . Hitluk in kan hawipa kawi siang a thazang a thawn hi kan thei bal lo . Pa Ceu cu a ran nak in Suisui te itnak lei ah cun a va tli i Bible cu a va lak i Kawi siang attang cung ah cun a chiah i duhsah tein kawisiang zong cu a van tha ve . Cu tlawmpal ah cun suisui te itnak khaan chung lei ah cun minung thawchuah thawng cu thang nawnpi in kan theih i a ran nak in kan va lut i kan zoh i zeihmanh kan hmu lo .

An itnak le itkhun tang vialte kan bih nain zeihmanh kan hmuh lo . Cuvial ah cun kan itnak innpi lei cun thawngpang kan theih than i a rannak in kan va tli than .Tuanglai i kan it nak puan kan phah mi cu a rak i bil dih i tha tein thutden cung ah a rak um dih . kan 4 cun kan i zoh hna i kan lau tuk cio tihnak in kan khat cang , a ho dah na si na ngamh ah cun rak chuak ka ti i ka au len nain zei thawngpang hmanh nih a kan let lo . Cuvial ah cun kan hawipa kawisiang a hngawng cu ka zoh i hri reh mi bantuk bak khin ai ngel dih . Cunglei in thawngpang kan theih i kan van kan cau i kan zoh cun minung keneh bantuk cu ceiling cung ah cun a um thluahmah i minung kal thawng bantuk cu kan theih thluahmah fawn .

Tihnak in kan khat i tlawmpal ah lenglei cun minung thawchuah thawng bantuk cu thang nawn in kan theih than i kan phone mei kan ceu i a ran nak in lenglei ah cun kan va chuak nain zeimhanh kan hmu fawn lo . Arannak in innchung lei ah kan rak lut than i kan tuang lai ah cun thisen lawngte a rak um kan khuaruah a har tuk cang .Ka kut in thisen cu ka tongh i ka hnimh cu thisen hring rim bak a nam ko . Thisen cu tuanglai ah cun ai tlai i coka lei ah a kal i thisen cu kan zulh i an coka kutka lenglei chuahnak hram ah a dong i lenglei kan va chuak i thisen cu ai tlai thluahmah .

Thisen cu kan zulh thluahmah ve i pakhat pa ai awh nak lei ah kan kal thluahmah ti hrim kan rak i thei lo , thisen ai tlai mi cu a dong i kan dir i pakhat pa aiawh nak hram bak thing kan hau nak zawn bak cu a rak si . Thisen cu cunglei in a dor tete in a rak tla thluahmah i cunglei cu tih bu te cun kan zoh i thingkung cung ah suisui te chizawh a rak i thlai i a pawpi leng ah a chuak i thisen a rak zut thluahmah mi a rak si . Culio ah cun ruahlopin ka thinlung ah a rak lang i “khawi hri kha ” ka ti i suisui te innlei ah cun ka tli colh ka hnulei cun ka hawile nih cun an ka dawi colh ve i suisuipa nih an inncung lei i pakhat pa aiawh nak hri cu ka va lak .

Mei kau zawk u ka ti i an kau i hri cu zinan kan toih i kan khangh , culio ah cun suisui te itnak khan lei cun minung tah thawng bantuk kan theih i inncung lei zong in minung tlik thawng bantuk cu kan theih thluahmah , an inn cu mi pakhat nih hin hel seh law a thawchuah thawng bantuk cu kan theih thluahmah i a rapthlak taktak minung fa nih tuarkhawh ding phun cu a si lo kan ning tih ning cu chim awk thalo a si . Hri cu mei cun kan khangh thluahmah i thli zong a hrang thluahmah ve . duhsah in hrin cu ciamdih in a kaang i thawngpang zong cu a dai ve .

cuvial cun kan hawipa Kawisiang nih cun muithla kan tei cang a ti i a mak tuk mi cu a hngawng i hri neh vialte kha a lo dih ve colh .Nazi kan zoh i zinglei sml 4 bak a si cang , a thar in kan itnak cu kan phah than i kan it i nazi 7 hrawng cun suisui te chung khar cu kanmah ruah deuh ah an rak ra i an rak lut ve . Zan ah zeidah nan ton ti a kan hal ah cun zeihmanh kan tonglo tiah kan chim lai kan ti bantuk cun zeidah nan ton an kan ti zong ah zeihmanh kan tong lo ti cun kan leh hna . An chizawh kha ti i a thih belte kha an ruah a rem lo i sahngar kan put ve tawp , an muihmai ah cun zan ah pakhat khat an tong ti cu an kan theih ti cu a lang nain an kan hal lem ve tilo . Cuhnu cun zanthum tiang kan riahpi ve lawlaw hna i thawngpang theihding a um tilo hnu cun kan mah le inn cio ah kan rika ve than hna .

Note : hi kong hi a taktak in tonmi a si i khuamin le minung min cu langhter a remlo caah min dang tu in kan phuah chom mi a si .

 

 

 

Be the first to comment

Leave a Reply

Your email address will not be published.


*