March 29 ah Kalay myone “Si ta” le Nat Myaung” khua i kawl ralkap le mipi an i kah nak kong fiangfai tein theih a si cang i hi i kahnak ah hin a thimi an um lo cu Pathian venhim nak taktak a si ko .Thil sining cu a tlangpi lawngin kan rak langhter lai i , Tahan ah i kah nak a chuah hnu in Gan Gaw lei in ralkap tampi kalaymyo lei ah an rak rat ter than hna tiah theih a si i , Gan Gaw lei in kawl ralkap an rak chiah than mi hna a rak ra mi hi motor 10 hrawng an si tiah theih a si .
Cuti i Gan Gaw lei in ralkap an rak rat ter mi hna cu Kalaymyo an phak khawh lo nak hnga tiah Nat Myaung khua pawngkam i khua pawl nih lampi ah thingkung lianpi in an rak kham hna i cuti thingkung an kham mi cu va thial dingin kalaymyo lei in ralkap motor 3 an rak thlah ve than hna .Kalaymyo lei in a rak ra mi ralkap pawl nih cun mipi nih lampi an rak phih mi cu an thial thluahmah i Nat Myaung khuami pawl nih cun kan lamphih mi an thial khawh i an rak luh khawh a si ah cun hika hmun ah hin kan phih than hna lai i an pah ngam a si ah cun kan kah hna lai tiah hmunhma an rak la cia ve .
Ralkap pawl cu Nat Myaung khuami nih lam an rak phih than nak an rak phak bak cun Nat Myaung khuami nih cun an rak kah ciammam hna i ralkap pawl cu kalaymyo lei ah an zam thluahmah . Asinain GTI sianginn pawng i a um mi Zin Ka Linn khua luh kaate ah cun mipi nih biatak tein an rak kah ve than hna tik ah khawika zamnak an thei tilo i GTI sianginn chung ah an zam .
GTI sianginn cu fimcawnnak a si caah mipi nih cun an luh hnawh ti lem hna lo i cuka ah cun kawl uico pawl cu zankhat chung an riak tiah theih a si .Lamphih mi va thial dingin a kalmi kawl ralkap pawl hi a hmasa ah cun motor 3 lawng a si nain khuami nih an rak kah hna hnu i an kir lei ah cun motor 7 an si cang i mipi ruahnak ah cun kha ti i khuami nih an kah hna ah khan kalaymyo lei in ralkap motor 4 an rak thlah than hna tinak a si lai tiah ruah a si .
Gan Gaw lei in a rak ra mi ralkap pawl don ah a kalmi motor pawl zong cu a taklawng in an si hna i , Gan Gaw lei in a rak ra mi ralkap pawl hi khawika hmun ah dek lam hna a pit i kalaymyo lei in donan va timh hna tu a rak si ko lai tiah ruahnak zong a um . Zeica tiah Gan Gaw lampi ah hin motor kalkho loin mipi nih lam an phih nak a um tiah a chim ceihmi zong an rak um len ve fawn cang .
Khati khuami nih ralkap pawl an kah hna ah khan ralkap lei in an let ngam bak hna lo i an mah himnak tu ah lutaw hngal lo in an zam tiah theih a si . An zumh ning ah cun anmah thazang a tlawm lio deuh te a si caah khuami hi an kah ve ngam hna lo nak a si lai tiah zumh a si .Ralkap lei a thimi le ai hliam mi an um lem lo tiah theih a si i khuami zong a hohmanh a thi le ai hliam mi an um lo tiah theih a si ve fawn .
Zeipoah a si ah minung zeizat nunnak dah a liam lai i minung zeizat dah ai hliam mi an um te lai tiah thindomh in kan rak um cio lio ah a thimi le ai hliam mi an um lo cun Pathian venhim nak thawng in a si i lomh a um hringhram ko .Tuni thaizing lei ah hin zei bantuk thildah kan cung ah a phan than te hnga ? Thlatu cam zungzal rih ko hna u sih .
Source : An i kah nak hi ka chuahnak khua pawngkam te ah a si i , ka chung le , ka hawikom , i kahnak ah ai tel ve bak mi pakhat phone chawnhnak hmangin ka theihmi thawngpang a si . Credit : Sui Lian Thang (Note : Hmanthlak hi thawngpang tialtu a si .)
Leave a Reply