A tilio Corona virus kong ah vawlei cung mipi thinphang thlalau in kan um lio ah Pathian kilven nak thawngin kan nih kawlram cu Corona virus nih a kan phan rih lo i hna ngam deuh a si kan ti lio ah ngeihchiat awk ngai a si mi thil pakhat kan lairam ah a hung chuak than ve ai . Corona virus ruang ah i ralrin a herh tik ah ram thangcho hna ah cun dawr kal hau lo tein an duh mi thil poah online in an order i an mah le inn cio ah home service in an rak pek hna .
A si nain kan nih ram ah cun cu bantuk cu a si khawh rih lo caah mah te i mah herh mi poah dawr ah va kal i vai i cawk a herh . hi kong he pehtlai in kan ram pi hruaitu hna nih hmailei a cang ding mi thil an hmuh cia caah le hi corona virus ruang ah ei le din kong ah kan ram mipi nih har nak an tong sual lai ti an ruah cia caah hi Corona virus ruang ah a hohmanh nih thil man nan kai ter lai lo i ningcang lo in thil nan zuar lai lo , corona virus ruang ah thil man fak pi in a zuar mi le thil ningcang lo in a zuar mi poah cu fak pi in dan tat nan si lai tiah nawl a chuah colh ve .
Cu ti Cozah nih thawngthanh nak a tuah caah kawlram chung ah khawika hmanh ah facang man an kai ter lo tiah kan theih . a si nain kan mah laitlang Hakha tu ah cun facang man cu a hlan nak a let in an kai ter caah mipi harsa ngai le lungre thei ngai in an um tiah theih a si . facang zuartu pakhat nih a chim mi cu corona virus tih ruang ah ralrin cia aherh ti in a si kho mi nih cun chungkhar pakhat nih facang tun 4/5 hna an hung i cawk tik ah facang cu kan manh taktak i a kal a rang taktak .
cu caah facang man hi kan kai ter chin thluahmah nak a si tiah a chim . hi ti facang man a kai tik ah sifak santlai lo nih cun facang tun khat i cawk hmanh a fawi ti lo tik ah ei lo in um a hau te dirhmun ah kan hung dir than . corona virus kong ah lungre theih dang khat eiawk fang kan ngei sual lai lo ti mi ruah ah lungre theih dang khat a si than cang i sifak san tlai lo caah cun zan hmanh ah kan i hngilh ti lo tiah Hakha khua nu khuapa sin in kan theih .
Kawlram Cozah nih facang man le thil man nan kai ter hrim lai lo i ningcang lo in zeithil hmanh nan zuar hrim lai lo , a zuar mi cu fak ngai in hrem nan si lai tiah thawngthanh nak an chuah ko bu in a tu bantuk in facang man a let bak in a kar ter tu Hakha Facang zuar pawl hi Cozah sin ah report tuah khawh a si i cozah biachah ning tein fak ngai in hrem khawh a si fawn . a tu hi kan zoh cuahmah lio hna a si i facang man hi kawlram zong ah a kai lem lo caah tu bantuk in nan kai ter awk a si lo tiah a nem nak tein kan chimh lio hna a si .
a si nain an zia an thinh hlei lo a si ah cun cunglei ah report nak kan tuah taktak cang lai i facang zuarkho ti lo le zeithil hmanh zuar kho ti lo in an pawcawm nak tiang phih piak an si pin ah cozah biachuah ning tein fak pi in an mah tu hrem an si taktak cang lai tiah Hakha Sang pakhat khuabawi ( min langhter lo mi ) sin in kan theih .
Credit : Hakha Sang pakhat khuabawi
Note : min langhter a duh lo caah a min cu kan langhter lo nak a si .
Leave a Reply