China in USA ah Khuaruahhar Thlaici Phundang A Lutmi Cu A Hohmanh Cing Lo Dingin Rampi Mi Vialte Theihter Colh An Si

China ram in thlaici phundang ngai a si mi cu USA ran ah post office hmangin a lut thluahmah i , USA lei thlaici lei tuanvo ngeitu nih an zoh tik ah a hohmanh nih hi thlaici hi hman lo ding le cin bak lo dingin thawng an thanh colh ve .Washington Virginia ramthen ah a tam khun i hi thlaici hi an mah nih an cah chom mi si lo in post office lei in an inn bak ah an rak phakter thluahmah mi a si tiah theih a si .

Inn ngeitu zong nih an cah lo mi post office lei in an mah inn cio ah a rak phan mi thlaici cu an mah nawl in cing thluahmah ve lo in thlaici lei tuanvo ngeitu sin ah an chimh ve hna tik ah thlaici lei tuanvo ngeitu pawl nih cun cing bak lo dingin an ti ve hna nak a si .

Culawng si lo in US ram himnak ding caah riantuantu USDA pawl nih cun nan inn cio ah a phanmi thlaici kha kan mah sin ah nan rak ap dih lai tiah thawngthanh nak an tuah pin ah an mah bak nih innkip ah thlaici cu an va lak thluahmah ve fawn .Cuhnu cun China ram in USA ah thlaici phundang tuk a si mi a rak phan mi cu USDA lei nih tha tein zohfel nak an ngei ve colh lai .

“Zei thlaici dah a si i zei caah dah hman mi a si ti hmanh kan theih fian lo mi China ram in a rak lut mi chinchap cu kan ram caah tihnung a chuahpi lai ti kan phang i thlaici vialte cu kan cinlo lawng silo in kan hrawh dih lai. Kan ram nih kan herhzat thlaici cu kan ngeihtuk ve ko “tiah Agriculture Commissioner Ryan nih cun CBS Media sin ah a chim .

USDA palai pakhat nih cun China ramin a rak lutmi thlaici hi hmundang ah kuat than ding timi zong a um lo nak kong le tihram nak hrimhrim in USA ah an rak kuatmi a si nak cu a chim i hi thlaici hi USA ramchung ah July 27 in lut hram an thok ti a chim fawn .Culawng silo in post in hi bantuk thlaici hrimhrim luhter ti lo dingin an kham cang fawn lai .

China ram in thlaici phundang a rak luh nak post vialte zong checkfel dih dingin timhtuah nak an ngei i , USA ramchung ah hi bantuk China thlaici a luhnak hmun hna cu , Kentucky,New York,North Carolina,Maryland le Virginia ramthen pawl ah an si . (ABC7,CBS)

Credit : Vapual Auaw

Be the first to comment

Leave a Reply

Your email address will not be published.


*