AA Ralbawi || Rakhine Ramkulh Ah Cun CDM Cawlcanghnak A Herh ve Lo Timhtuahmi Kan Ngei Cia

Tulio kawlram buainak ah CDM cawlcanghnak nih kawlram ralkap pawl beidongin a tuah hna lai tiah ruah a si i ram chung hmunkipah CDM cawlcanghnak cu tuah a si tawn. CDM cawlcanghnak tiin cheukhat cozah rian tuan pawl zong an rianin an i phuak i ralkap uknak duh loin lam an zawh. Cu bantukin CDM cawlcanghnak cu Rakhan ramkulh ah cun a hau tuk lo tiah Rakhine ralkap AA hotu Thun Myat Naing nih cun a chim.

Cun April 10 ah Rakhine ralkap AA kum 12 tlinnak puai zongah ca a kuat. Cu ca cu mipi caah rel piak an si pinah Rakhind mipi zong rel piak an si. Ca chungah cun AA hotu Thun Myat Naing nih cun Rakhine ramkulh chungah CDM cawlcanghnak le lamzawhnak ngeih cu kan duhmi a si lo i a herh fawn lo. Kanmah nih kan thut dir ning kong cu fel fai tein kan i suai cia cang.

Kan I timh cia bantukin kan kal peng ko lai. A kar lakah buainak zeihmanh kan duh hlei lai lo tiah a chim. Cun nikum November thla in ralkap he raldonak kan ngei ti la lo ti zongah remnak kan rak tuah lo i zalennak caah bia kamnak zong kan ngei hlei rih lo. Cu ruangah zeitik caan paoh ah ral do kho dingin kan i manh peng hi kan herh tiah a chimchap. Kawlram ralkap nih phungning loin nawlngeihnak an lak hnuah mipi nih cun CDM cawlcanghnak le mipi lamzawhnak in ralkap uknak duh loin an dohkalh peng nain Rakhine ramkulh tu cu CDM cawlcanghnak le mipi lamzawhnak a tlawm biknak hmun a rak si.

Asinain ralkap nih phungning loin nawlngeihnak an lakmi cu Rakhine ralkap AA nih cun an cohlang ve hlei lo i meithal hmetpuak rih loin rualremnak an rak tuah hnu ah tlang cung ralthuam tlai a tan mipi pahnih hna TNLA le MNDAA zong April 10 zingah Lashio le Mandalay karlak i um mi Naungmon palik sakhan pi cu an rak kap i palik 14 bak an rak thi ti zongah theih a si.

Be the first to comment

Leave a Reply

Your email address will not be published.


*