A Poi Bak Cang || Tlangcung Hriamtlai Veve Anmah le Anmah An i kap i Khuami Inn (34) An Khangh Dih Ve Hoi Ai

Hi tluk in kawlram buai lioah tlangcung hriamtlai cheukhat pawl cu an mah le an mah an rak i do an rak i kap ve hoi i khua mipi pawl cu ralkap tih le tlangcung hriamnam tlai pawl tih in thinphang in caan an hmang hna. Tutan i tlangcung hriamnam tlai veve an i donak cu Shan ramkulh chung i um veve Shan ralkap RCSS le Ta’ang ralkap TNLA pawl an si.

An i kahnak hmun cu Shan ramkulh Kyaukme District Namtu Myone Manli khuaah a si. Khuami pawl nih cun khawika in dah i kahdo nak hi a chuah ti zong an thei kho lo i tlangcung hriamnam tlai tih le kawlral kap tih in thinphang le lungrethei in an um lio a si. Tlangcung hriamnam tlai pahnih an i do hlanah khuami pawl cu khua chuaktak dingin an chimh hmasa hna i mipi nih khua an chuah tak hnuah RCSS le TNLA cu fak ngaiin an rak i do.

Tlangcung hriamnam tlai pahnih hna an i do ruangah khuami inn pawl cu chunah inn 4 an kang i zaanah inn dang 30 cu a kang than. A dih lakah khuami inn 40 tluk a kang. Khuami pakhat nih cun zeitin dah inn a kangh hi cu kan chim kho lo. Zeiruangah tiah cun May 2 khan khuachuah tak dingin an rak kan chimh i chunah cun inn cu a kang i a langpar lawng cun inn kang zong cu kan hei hmuh khawh.

Zei ruangah timi cu theih khawh a si lo.Amah bel te mizeibantuk dah khuachungah a lut hmasa ti cu kan theih ko nain kan chim ngam lo. Inn kangmi lakah hin inn tha taktak mi zong tam pi ai tel. Kawlram ralkap kong lam hi cu a chim hmanh kan chim huam ti lo. Kan nih cu Pa’ang ralkap zong kan tih hna bantuk in Shan ralkal zong kan tih thotho hna i kawlram ralkap zong kan tih hna.

Eidin kong le riantuannak kongah hin zeihmanh thinphang ding le lungretheih ding kan ngei lo i kan khua te i um i inn kangmi hna cu sak i thaadam ten um hi kan duh bikmi a si ko tiah DVB ah an rak chim. Shan ramkulh chungah tlangcung hriamnam tlai hi tam tak an um i cu chungah cun TNLA ralkap le RSCC ralkap cu Shan ramchung hmunram i cuhnam ruangah an rak i do lengmang.

Tutan kawlram buai lio pi zongah kawl ralkap hmanh do loin an mah le an mah cu hmunram i cuhnak ruangah an rak i do cu a si. Kan hnu deuh piah Manli khuaah inn 5 cu an rak khangh cang i tutan zongah inn 34 cu a kang i a dih lak cun inn 40 tluk an khangh piak cang hna ti si.

Be the first to comment

Leave a Reply

Your email address will not be published.


*